ACEH LEUBEH PENG.

 Aceh Leubeh Peng(?)

Meunye leubeh peng tanda ka makmu

Barat ngon timu gob kheun ka kaya

Bak rumoh tangga meunan berlaku

Cit gohlom teuntu bak Nanggroe raya

Miseue di Aceh lon sareh laju

Ujong thon taeu  leubeh beulanja

Nyan APBA leubeh meutabu

Salah peulaku, kon tanda kaya!

Anggaran tiep thon teulat berlaku

Pakar nyang brisu lam surat kaba

Aceh taharap beurijang makmu

Antanjo laku  le tinggai SILPA

Aceh  leubeh peng kon tanda makmu

Sabab deuh taeu rakyat dum papa

Rakyat lam nanggroe rame hansep bu

Utang meutabu udep seungsara

Jan teungoh meugoe meu-utang laju

Bak bloe minyeuk U meu-utang baja

Watee keumeukoh geubayeue teuntu

Tan tinggai sapeue geupuwoe cit pha

Meupalet-palet udep lam tunu

Hanasoe bantu tansoe pareksa

Anggota Dewan seungab hana su

Rakyat peureulu Pemilu saja!

Rumoh sikula barat ngen timu

Ka reuloh bangku bubong dum guha

Aleue ka beukah binteh ka lhu-lhu

Mija di guru hana seple pha

Peuelom tapeugah keu Dayah Teungku

Siumu-umu  lam ala kada

Jareueng na dana keunan geubantu

‘Ohtoe Pemilu rame gob jakba

Rot  gle Seulawah jalan u timu

Tiep seun ulon eu tampai ban ija

Reuloh sagoe jeh tanpai sigeutu

Lhee buleuen umu rusak lom teuma

Meunye leubeh peng han meunan laku

Geubloe nyang baru dak miseue ija

Salang toe Banda meunan hai Teungku

Dan lagi itu Jalan Negara

Peue lom diudek tasek beuru-ru

Jeuoh apui hu teuntee han peuja

Jalan disinan wa ‘amma bakdu

Kadeuh droeneuh eu  wahe pembaca

Aceh leubeh peng(?) rakyat that tunu

Jiwoe meu’u’u keudeh Jakarta

Adak han Aceh ka leubeh maju

Rakyat pih makmu peng le  meuputa

Dilee yoh diet peng bingkeng ngen tunu

Kheun ini-itu  gob ade hana

Jinoe ‘ohle peng dalam Bank tudu

Allah Tuhanku Aceh nyan kada!

Bak  DPRA   geutanyoe meusu

Nanggroe neupayu  beuna sijahtra

Rakyat ka carong hanpeuele rayu

Buet deungon meusu peuena meutuka(?)

Meunye tan saban su dengon laku

Rakyat han rindu geupileh gata

Di kamoe galak peumimpin jitu

Rakyat beumakmu nanggroe sijahtra!!!

                                             T.A. Sakti

@Peminat sastra Aceh

Catatan: SILPA = Sisa Lebih Pembiayaan Anggaran